蔡興麟．九三

1993年係GARY活躍樂壇嘅最後一年，對上一年公司做到嘅都幾乎做晒：搵一線製作人做碟、搵師姐合唱、上節目、做主持、做MODEL、開生日會、開歌迷會、拎自己隻汪汪出嚟做訪問...... 但即使有好嘅成績都要靠不斷宣傳曝光去維持，更何況係呢個一年先出一隻碟嘅 '學生歌手'，唔再係新人 / '樂壇寵兒'，都唔使提家駒嘅離世，歌星之路第三年唔止難行，仲行唔到落去......

SML6026 (CD/CASSETTE)

DON'T STOP LOVING...

01. DON'T STOP LOVING...

02. 我這裡有你．你這裡有我

03. 最後一闕小怨曲

04. 你為何讓戀愛倦了

05. 暫時相戀

06. 落泊心曲

07. 追追躲躲

08. 後悔的眼光．讓眼晴說謊

09. 如果明天

10. 得過且過

你話公司唔捧佢咩? 又未算，偶像包裝當道，至少都幫佢執過晒啲形象，第一眼留意到嘅係頭髮長咗同染棑咗，亦唔使再著老西，開始自己披披搭搭加啲ACCESSORIES，GARY自己亦努力減肥減水腫減走BABY FAT(聲稱減咗30磅)，成個人SHARP咗。

歌路方面，第三代監製盧金源老師完全抹晒GARY高音清聲紮實激得起嘅優點，反而180度轉新路比佢行：唱迷幻中快版歌同深情內歛慢歌，把聲同感情收得入咗好多，而歌詞亦比之前兩隻碟更有深度，對關係嘅描寫多咗深咗，亦有探討愛情觀，雖然啲嘢好似轉晒，但偏偏又搵到好多同上一隻碟相似嘅嘢......

首波主打 DON'T STOP LOVING... 改編土屋昌巳87年嘅同名作品，喺度要讚蘇德華老師手電結他編曲，唔知仲以為自己聽緊 石頭記，同上一隻碟都係佢編嘅ACOUSTIC啲嘅 如今 完全唔同，好有心思! SONY算勇，唔整隻穩陣BALLAD力谷，反而做隻懶懶閒又有少少挑逗嘅，我諗佢地係有諗過度過幫姣得起嘅GARY突圍，好似一句 '撕開封閉的夜' 就聽得出蔡生又扮哥哥唱歌，SONY衰唔晒，都叫做出過吓錢請咗兩位美女伴舞，令呢首歌成為GARY第一首亦係唯一一首跳舞歌。

GARY TONG老師上年作咗 講一句 比GARY，好係我杯茶，而今次就幫手編一首重節奏嘅 暫時相戀，呢首同 DON'T STOP LOVING... 嘅愛情觀完全相反，夕爺大筆一揮，將盧永強老師填嘅 '不應該疲累身影中　想找一晚尊重' 嘅耐心等耐心愛完全推翻，變為 '只顧心頭暖　誰理會是極短'，完結峰迴路轉嘅A SIDE愛情五部曲 (希冀>甜蜜>淒怨>疑慮>放任)，唔知咁啱定咁橋，暫時相戀 嘅另一句歌詞 '沒法可知如何留住浪漫　易說但難辦' 似係呼應返上一隻碟幫GARY寫嘅 永遠浪漫。

同樣係結尾歌，B SIDE代表 得過且過 同 暫時相戀 一樣又係HEA HEA地咩都唔想理，但西味重，西詞包括 '愛你仿似攀登帝國大廈' 同 '我愛本性嬌羞那個嬌娃'，入面又有把姣女和聲對唱幾句，西爆，但西人如我當然鍾意啦哈哈!

今次隻碟最特別嘅係有兩對孖寶，兩PAIR都係由一首本地原創歌加一首日本改編歌所組合而成，而各自嘅歌名風格或歌詞內容都非常相近，首先介紹 我這裡有你．你這裡有我 同 後悔的眼光．讓眼晴說謊，淨係睇歌名對得咁工整就知咩事啦!

我這裡有你．你這裡有我 改編自 TO BE CONTINUED 同年單曲 君とずっと...くらしたい (睇嚟監製好鍾意呢隊喎，前後兩隻碟已經COVER咗佢地成三首歌)，可以話係上一隻碟嘅情歌主打 COME BACK TO ME 嘅延續，配合潘偉源老師一貫深情嘅歌詞 '深深這份情　應轟烈燒過　熱烈的燒過　狂熱了'，難怪成為派台歌之一。

至於由監製盧老師親自作曲嘅 後悔的眼光．讓眼晴說謊 係小弟嘅心水，對比上一隻碟嘅K歌代表 我的心仍然被她佔領 唔止一樣排喺B3位置，亦同樣由盧東尼老師編曲 (係喎碟入面兩首監製原創作品都係佢編，可以話係另一PAIR監製孖寶! 等我下面岔開再講)，仲特登好似 得過且過 咁加咗幾句女和聲入去，好似佢地兩個情深對唱咁，效果唔錯，不過唔鍾意一句歌詞 '如像眷顧小孤雛'。

監製孖寶第二擊：馮鏡輝老師上次作咗首金曲 現代愛情啟示錄 比GARY，今年繼續度身訂造同類型柔情小調 追追躲躲，好適合做古裝片嘅主題曲架!

講返原先想講嘅另一對孖寶 最後一闕小怨曲 同 落泊心曲 先，兩首都係有心谷嘅歌，前者既係金培達老師嘅作品亦係第二主打，後者則改編稻垣潤一91年單曲 CONGRATULATIONS，除咗放喺B1位置，更由GARY親自填詞，而兩首嘅相同之處在於主題都以 '奏曲' 比喻愛情。

最後一闕小怨曲 歌名淒美，配合小提琴編曲可謂一絕，開頭掃嗰幾下結他聲更倍覺冷清，而 落泊心曲 嘅歌詞就充滿詩意，'冬季遍夜下雪破白晝' 同 '演奏每段樂韻心內扣' 都填得好靚，難得GARY小小年紀已經咁好文采。

今次宣傳期比上一隻碟遲，上年夏天已經去緊，講吓暑假玩啲咩奧運睇啲乜，今年 DON'T STOP LOVING... 大約中秋先派台，當時嘅音樂節目同場仲有佢兩位好 '家姐' 一齊出鏡：王靖雯宣傳 SUMMER OF LOVE，彭家麗宣傳 <超能幹探>，而喺第一隻碟入面為佢作曲嘅倫永亮老師同埋同期新人李國祥就宣傳 總有你鼓勵，至於幾乎次次都同佢同期宣傳嘅劉文娟，今年亦較啱咁上下時間宣傳 愛戀總不可長久，而 最後一闕小怨曲 更加係冬天先PLUG，當時仲去埋 <翡翠歌星賀台慶> 同籌款節目配合宣傳。

白版：最後一闕小怨曲 (CXD148)

講到碟入面覺得較為失色嘅作品係改編和田現子88年單曲 だってしょうがないじゃない 嘅 你為何讓戀愛倦了，個歌名已經...... 歌詞仲勁 '我願重拾你真摰地笑　如從前熱烈太美妙' 美妙都填得出...... 跟住唱啲 'HA' 又 'HA' 得好勉強咁...... 好彩編曲同 DON'T STOP LOVING... 一樣比較迷離，總算救返首歌。

最後想特別講吓 如果明天，雖然呢首歌表面上係一首小品情歌，歌詞 '真心交出每天' 亦呼應返上一隻碟 真愛 嘅 '真心去愛'，但同時亦好啱作為GARY同FANS之間嘅歌，喺呢度我想送返入面幾句歌詞比GARY，希望佢知道到今時今日仲有人一路支持蔡興麟：

多感激終得你與我走過未來　快樂與悲哀
如果明天　終生可擁著你肩
但願停留在你眼前　一生都不會搬遷
路是多遠　有你伴我歷險
多少的風雨　都不可改變　真心交出每天

時也命也，我成日覺得94年係樂壇嘅分水嶺，音樂類型同人事變動都好大，而SONY一家人亦未能倖免，個個苟延殘喘半停產：大家姐劉美君聲帶生繭，沙住聲錄音，二家姐彭家麗做 日女人 做到死心，退下火線教唱歌，ELLEN姐陳雅倫雖然出足兩隻碟但始終做唔到第二個卿卿，只能喺樂壇 隨便坐，'好兄弟' 陸家俊得罪人多仲要跌傷，無奈避走讀書，至於GARY...... 記得GARY喺網誌上提過，自己19歲時曾誤入一條黑暗隧道，我諗唔多唔少都關解約/失意樂壇一事，屬於蔡興麟嘅廣東歌，係好係差都唔應該得30首咁少!

'93小鮮肉? 一睇就知蔡生幾'保守'啦... (簽名照為 '娛記正傳' 珍藏展覽品)

photo credit: gary & his team@weibo (15, 16 of 21)

- - - - - - - - - - - - - - - - - - - -

[last updated in May 2020]

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

蔡興麟．九二

相隔半年到，GARY又趁暑假返香港宣傳第二張唱片 <COME BACK TO ME>，其實中間短短幾個月已經發生咗好多事：年紀輕輕已經要承受娛樂圈嘅明爭暗鬥是是非非 / 阿媽KINN執笠，王靖雯BEYOND一家大細各散東西要靠自己 / 阿爸SONY生咗個哎呀細佬陸家俊出嚟 (但陸年齡大蔡八個月兼比佢早入行)，都唔使提四大天王啦，所以佢出完第一隻碟之後已經想退出，究竟佢第二年嘅歌星之路係點樣行過嘅呢?

SML6014 (CD/CASSETTE)

COME BACK TO ME

01. COME BACK TO ME

02. 情感怎分對錯

03. 妳的另一半

04. 再見吧! BARCELONA

05. 真愛

06. 現代愛情啟示錄

07. 永遠浪漫

08. 我的心仍然被她佔領

09. 講一句

10. 如今

好在當年樂壇機會處處，GARY努力維持健康乖仔 (發埋獨身宣言稱十年內唔會拍拖)、音樂為主嘅形象，再憑住佢姓蔡呢個咁 '綠色' 嘅姓，有得同蔡濟文同蔡立兒一齊做當年嘅環保大使，仲有機會做 <夏日樂逍遙> 嘅開幕主持，再撈埋 <都市閒情> <婦女新知> 主持，得閒又去吓 <週末任你點>，總算有啲揸拿，而唱片設計亦以黃色同青蘋果為主，極力SELL青春活力同健康自然，唔使再好似第一隻碟咁初嚟報到扮老積。

主打歌 現代愛情啟示錄 無論歌名定曲式都擺明食住 現代愛情故事 條水，不過前者講拖拉後者講灑脫，由啱啱憑 是不是這樣的夜晚... 你才會這樣的想起我 HIT爆嘅彭家麗師姐帶住，效果唔錯，仲同 為了妳．為了我 一樣做到季選候選歌，連SONY都要第二年特登補拍返個自家KTV比人唱。

至於點題作品 COME BACK TO ME 原曲係對上一年馬來西亞SONY新人黃世豪嘅主打 讓你感覺我的心在說愛妳，同公司用得唔好嘥一雞兩味，監製馮鏡輝老師落足本搵晒一線製作人執靚件衫，總算為咗隻碟盡心盡力，應記一功，林振強大師填詞，交出一貫個人風格，杜自持老師編曲，將首歌重新包裝得非常西化同浪漫，一開口 '深宵之中呼叫你許多次' 詐聽仲以為係哥哥唱緊歌。 


禮尚往來，國語版嘅 現代愛情啟示錄 就比返黃唱，連個名都跟返一樣咁濟，叫 讓你感覺我的心再說愛妳，收錄喺彭嘅 新曲＋精選 入面，正式結束今次港馬音樂交流。

白版：COME BACK TO ME (CXD135) /
再見吧! BARCELONA (CXD136) /
現代愛情啟示錄 (CXD137)

出碟後GARY KEEP住出SHOW唱LIVE谷第二批主打接力，包括：唱腔帶哥哥/阿LAM味道嘅異國風情 再見吧! BARCELONA (又食當年BARCELONA搞奧運，姊妹歌名仲有黃寶欣嘅 來吧西班牙)，日系ROCK STAGE 永遠浪漫 (改編池田政典89年單曲 冷たいベッドでDANCE，繼續由ANDREW老師悉心編曲，可見都有心谷吓)，同埋蔡國權老師嘅原創情歌作品 我的心仍然被她佔領 ，咁就PLUG咗半隻碟。

SIDE TRACKS方面，有傳統型一苦一甜情歌 情感怎分對錯 同 真愛，改編日本SONY樂隊TO BE CONTINUED 91年勁度十足單曲 息詰まっちゃうよ 嘅 妳的另一半，GARY TONG老師MOODY NIGHT之作 講一句 (亦係小弟心水) 同ACOUSTIC結尾歌 如今，無點你，各有特色，首首都PLUG得過。

監製穩陣，AB兩面風格統一 (主打打頭陣>保守歌/勁歌留住人聽>玩味歌>簡單舒服歌收尾)，總括今次隻碟流暢好聽，曲風多元得嚟又夠平衡，仲要十首歌用咗九個填詞人，可見都想靠眾詞人之力摸索GARY嘅可能性，順帶一提個MASTERING非常靚聲，果然係SONY出品。

只怪當年樂壇太大競爭，要上位真係好難，不過唔緊要，至少到而家仲有人對GARY嘅碟珍而重之，而蔡興麟呢個名亦永永遠遠被香港人記住，我諗都已經好足夠。

下面係一篇同期我覺得幾全面嘅雜誌專訪，裡面講晒GARY嘅入行經過同埋唱片花絮，喺度打晒成篇出嚟，希望大家睇完都會了解佢多啲!

陪同學參加歌唱賽　蔡興麟偶然投樂壇

蔡興麟推出第二張唱片，在新碟中，與彭家麗合唱了一首歌曲，為了配合宣傳，他們最近出雙入對，拍拖傳言隨即而起，令他們深感無奈，但兩人並不避忌，表示會繼續為歌曲宣傳而走在一起。


十年保證，不會拍拖

蔡興麟透露與彭家麗合作，純粹是歌迷鼓勵，因為他們曾在「紅白對對碰」音樂會中合唱「無言的結局」，當時得到很好反應，所以唱片監製特別製作了一首合唱歌曲，希望加強唱片吸引力。

蔡興麟曾經向歌迷保證十年不拍拖，所以與彭家麗只是合作對手，而彭家麗更笑言兩人是「姊弟」關係，儘管年紀上她較年輕，但由於外貌及打扮成熟，所以她自居為「大家姐」。

蔡興麟表示，他希望專心發展事業，而他是個一心不能二用的人，他希望對唱歌全情投入，能夠得到好成績。

蔡興麟踏足歌唱這個演藝圈子，也正由一個偶然而起。


紐約奪獎，開創前程

他表示在十六歲那年，他正在美國求學，除了唸書之外，還學到一些不可多得的社會經驗。他的同學要求陪同報名參加「全美華裔青年歌唱大賽」，那時候，在全無心理準備下，居然也填了報名表格，更成為參賽者的一份子。

初時，滿以為這個比賽，只是唱一些廣東粵語歌曲為主，誰料到國語才是必選的參賽歌曲呢!

幸好，由於他是外省人，自小便需以普通話與家人溝通，所以唱起國語歌曲，一點也不難，更幸運地奪得紐約市的冠軍。

其後，還得與來自不同地區，如三藩市、羅省等的華裔歌唱冠軍，一同進行總決賽，這次，他也得冠軍，還開始了歌唱生涯，直到今天。


未能拍戲，略感失望

第二張唱片推出數日後，反應不錯，因為應接不暇，要再印製另一版，令他很開心。

他又指稱，其實入行未夠一年，但因為去年底推出首張唱片，立即競爭新人獎，他指雖然未獲任何獎項，但能夠進入十名以內，已經很開心。

他說自己仍是新人，但已得到歌迷的支持，在八月底將於大專會堂舉行歌迷會，並且在這時，會順道宣布與經理人簽約事宜。

他自覺幸運，唯一最近感到失望是，原本有機會參與劉國昌執導的青春片，嚐試拍電影滋味，可惜與唱片宣傳撞期，惟有放棄這次機會。

他認為年輕是本錢，只要肯努力，不愁沒有機會。

photo credit: gary & his team@weibo (5, 12, 14, 15, 16, 17 of 21)
- - - - - - - - - - - - - - - - - - - -
[last updated in May 2017]

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－

蔡興麟．九一

1991年夏天，GARY同一般喺外國讀書嘅學生哥一樣趁暑假飛返香港玩，不過今次有啲唔同，因為要去搵返舊年喺紐約睇中佢嘅BEYOND經理人陳健添，最終順利簽約KINN做經理人仲入埋SONY，九月極速製作人生第一首歌 為了妳．為了我，十月極速推出首張個人同名大碟，星途由此開始。

SML6011 (CD/CASSETTE)

蔡興麟

01. 為了妳．為了我

02. 傷心約會

03. 真的想妳

04. 像妳這般的溫柔

05. 讓我流入妳的生命

06. 原來

07. 寂寞就是默默為妳狂

08. 不寄的信

09. 祇為妳

10. 離開情網

近水樓台，隻碟最大嘅賣點自然係BEYOND式 + 滾石式製作，監製王紀華老師係當年BEYOND嘅監製，為了妳．為了我 更加係家駒同劉卓輝老師嘅心血，成條TEAM都睇到GARY嗌得起激得起，雖然未至於要好似BEYOND咁ROCK，但碟內大部份作品都屬於中版激歌，挑戰大量高音真音，少啲實力都未必唱得掂。

陳喺微博上交代，當年家駒作咗一堆唔啱BEYOND唱嘅歌，第一時間益 '乖囡' 王靖雯先，但當時監製梁榮駿老師只係揀咗 可否抱緊我，再等一年 為了妳．為了我 終於落入GARY手中，但都要好多謝家駒，呢首歌獨有嘅現代小調風格令GARY一曲成名，我知有人嫌GARY唱得硬板板，但我反而欣賞佢嘅實淨，首歌真係一啲都唔易唱，而呢首歌唔單止係當年嘅勁歌推介，仲順利成為季選嘅候選歌曲之一 (見圖)，連飛圖都幫佢拍KTV，新人嚟講絕對把炮。

緊接住嘅第二主打 傷心約會，又係近水樓台嘅關係拎到日本SONY樂隊TUBE同年5月出嘅單曲 湘南MY LOVE 做COVER，信我，之前未聽過呢首歌嘅朋友，即使淨係聽前奏都應該會有 '哦呢首好熟喎' 嘅感覺，因為原曲實在幾紅。

白版：為了妳．為了我 (LP) (CXA127) / 傷心約會 (CD) (CXD128)

兩首好歌之後帶嚟兩首SIDE TRACKS過過場抖抖氣，真的想妳 改編自黃品源同年作品 當我再次接到電話的時候，唔易唱架句句都要用力，像妳這般的溫柔 係倫永亮老師嘅作品，可以話係林憶蓮 沒有發生的愛情 嘅姊妹作，同樣嘅作曲填詞班底，推出時間接近，曲風又一致，當中歌詞寫得非常好：

風中輕飄一個紫色氣球　是我笑著任意的放手
祝福它可飄到遠方旅遊　像我這夜能遇上知心友

欣賞潘源良老師短短頭四句已經填得個意境咁靚，我幾鍾意呢首，而GARY亦多次喺微博上多謝倫老師作咗呢首正歌比佢，最感動嘅係老師並無忘記佢，仲次次回覆同轉發。

回完氣又有兩首主打接力，讓我流入妳的生命 原唱係趙傳90年嘅作品 不曾在你面前掉過淚，擺明係高難度SHOW OFF激歌，原來 改編自周華健同年作品 原來我從來沒問過自己，屬典型滾石曲風，配上潘偉源老師充滿自省醒覺意味嘅歌詞，難怪放於B1位置。

寂寞就是默默為妳狂 係小弟全碟最鍾意嘅一首，原曲係周華健88年嘅作品 我是真的付出我的愛，喺度要讚讚編曲嘅梁翹柏老師，將原版溫馨甜蜜嘅感覺改為節奏明快並帶有BEYOND色彩嘅編曲，而GARY自己VOCAL上亦處理得乾淨利落，一句 '但也輕易淡淡失意地唏噓' 用真音上! 好堅!

李國祥合照為 '娛記正傳' 珍藏展覽品

嗰陣時啲歌好興彈個英文名好似JACKY/LINDA/CRYSTAL，而GARY呢首 不寄的信 就用EMMA，雖然係由馮鏡輝老師作曲，但感覺唔太似佢風格，太慢太肉麻同太淺白啦， 'EMMA快愛上我可好嗎? 何必偏等我一封信' '寫寫寫得一面亦紅筆尖都譏諷' 聽到我打晒冷震面都紅埋，實在想像唔到係出自周禮茂老師嘅手筆，對我嚟講算係失色嘅一首。

同樣係肉麻歌，改編自伊豆田洋之89年單曲 ALGO 嘅 祇為妳 就易入口好多啦，當然要多得杜自持老師精心嘅西式浪漫編曲啦!

離開情網 係GARY TONG老師小品得意之作，一聽前奏已經有嗰種大男人灑脫豁達自得其樂嘅風格，亦都係碟入面比較輕鬆討好嘅作品，我自己就好鍾意，放喺全碟LAST CUT亦非常適合。

感覺上隻碟係平均KINN揀一半SONY揀一半：

KINN: 為了妳．為了我/真的想妳/讓我流入妳的生命/原來/寂寞就是默默為妳狂

SONY: 傷心約會/像妳這般的溫柔/不寄的信/祇為妳/離開情網 


總括全碟首首好歌，曲風新鮮，有別於當時一般本地製作，而GARY響亮嘅聲線同紮實嘅唱功亦能夠喺歌曲入面表露無遺，GARY曾經喺訪問中提及當時銷量對於一位新人嚟講係天文數字，難怪SONY急不及待過咗半年到已經開始做 <COME BACK TO ME>，雖然趕喺年尾出碟而拎唔到任何新人獎，但喺我心目中已經係最佳男新人!

早排喺舊音樂雜誌入面搵返兩篇GARY初出道時同歌星好友嘅對談專訪，上集係黎瑞恩而下集當然有家駒啦，相信大家對家駒嗰篇興趣較大吧 (我覺得最寶貴嘅係當中嗰幾張用錢都買唔返嘅合照呢!)，喺度打晒成篇出嚟方便大家細閱 (細V嗰份自己撳入去睇啦哈哈)，從字裡行間睇得出家駒真係一個大好人，記得GARY喺 <守下留情> 訪問入面提過，家駒第一眼都誤以為佢只係賣樣嘅偶像派，但下面明顯睇到好快熟落咗知佢唔係玩玩吓，於是非常主動處處關心同照顧GARY呢個小師弟。


後記：近日得知GARY喺社交平台分享咗呢兩篇訪問嘅合照 (連結：1 / 2 / 3 / 4 / 5 / 6)，真係好開心好激動，多謝GARY! 能夠為你儲起珍貴嘅回憶就係我最大嘅滿足! 亦令我更有動力去搵更多舊相比大家!)

好友連載對談　主角：蔡興麟　VS　嘉賓：黃家駒

(家駒及Gary正滔滔不絕的爭論關於『為了你．為了我』這首歌Key的問題……接著)

家駒：「原來劉美君加盟了Sony (唱片公司) ?」

Gary：「對! 同我一間。你現在是否在深山修練，外面的形勢你好像不太清楚喎! (笑)」

家駒：「點解要知啫! 自自然然便會有人會告訴我啦! 明天一起去BBQ吖!」

Gary：「唔得呀! 因為要綵排『歡樂滿東華』，要唱歌、玩遊戲，又要游冬泳。」

家駒：「在那裡游?」

Gary：「清水灣俱樂部。」

家駒：「我曾經去過，那時我還未夾Band，跟一個女拍擋到那個Club唱歌。其實是Fishclub介紹我去唱的，我還記得當晚是中秋節，我的喉嚨發炎，唱得十分差呀! 喂! Gary，近來嘅私生活檢不檢點呀? 有沒有同班姨太太玩? (笑)」

Gary：「哇! 不要胡說呀，我正忙於宣傳唱片。」

家駒：「你張唱片賣得如何?」

Gary：「頗理想啊! 多得你作的歌好囉!」

家駒：「不關事……」

Gary：「家駒，你會給『為了你．為了我』多少分呢?」

家駒：「我給滿分的，這首歌其實已寫了兩年，我寫好的歌會給Leslie (Beyond及Gary的經理人陳健添) Keep的，因為我怕唔見。」

Gary：「Beyond的唱片開始開工沒有?」

家駒：「相信要明年才開工，現在正揀歌。這段時間只是為廣州及深圳的Concert練歌。你何時錄音?」

Gary：「唱片公司有準備明年三月再出唱片，現在揀了三首歌。」

家駒：「我有歌，可以帶給你聽。」

Gary：「好啊! 好啊!」

家駒：「你想要Hit還是唔Hit的?」

Gary：「當然想Hit啦!」

家駒：「你想要No. One、Two Or Three吖?」

Gary：「沒有所謂，不過最好No.1啦!」

家駒：「那麼我介紹給你啦! 安全地帶、Southern All Stars都有好多Hit歌…… (笑)」

Gary：「那即叫我揀Cover Version，不是你作的啦!」

家駒：「我祇是講笑，我作的歌要不要給你監製聽過? 不如我錄給Leslie，叫Leslie給你。這張碟會否唱慢歌為主?」

Gary：「不，會有變了。」

家駒：「為何不做『情歌皇子』? 做『情歌皇子』好呀! (笑)」

Gary：「(笑) 我想Rock嘛!」

家駒：「不好，香港不受Rock的。其實不是不受，是要唱很久很久才被接受。」

Gary：「你們 (Beyond) 唱的歌都有保留Rock的元素，但依然受歡迎呀!」

家駒：「就是要唱得久囉! 由人家不喜歡唱到喜歡，問題是你有沒有這份毅力，當然以一個人歌手來說是沒有這個必要去冒這個風險。因為競爭大，但香港的Band不多，很難比較的。不過若要人百分百接受你就千祈不要唱Cover Version，因為若Band唱Cover Version唱成功了，下一隻都會是Cover Version，就算受歡迎但怎去衡量自己隊Band的創作功力去到哪裡? 好像『大地』、『喜歡你』，我沒想過這些歌會Hit的，但我們用不同方式去試，試到樂迷喜歡，然而這全部都是我們隊Band的歌，接著我們可以朝著這個形式去，但若唱Cover Version，下一步很難走。」

Gary：「Beyond出道至今出了多少張唱片?」

家駒：「八張，以前平均一年兩張，近年就一年才出一張。」

Gary：「你覺得目前歌壇哪一類型的歌曲或形象最被受落呢?」

家駒：「黎明、劉德華那種囉! (笑)」

Gary：「那麼是否形象比歌曲更重要呢?」

家駒：「我覺得完全沒形象實在不能，但若外表十分普通，在街上到處可尋亦不緊要，最重要的是在唱些甚麼。當那個歌手開始時歌不太多人認識，但外型可能會吸引樂迷的興趣去聽，聽過後覺得好聽的，樂迷已不再介意你的形象，你穿著得美不美，最重要的那個Point就是用音樂去打動到買你唱片的人。靚不可以長久，因為三年後可能出現一個更靚的。最緊要鍛鍊自己的音樂技巧，有空不妨去學學樂器。」

Gary：「家駒，告訴你一個好消息，就是你替我作的『為了你．為了我』曾經在港台的中文歌曲流行榜逗留十一個星期之久，最高位置去到第六位，成績算不俗吧!」

家駒：「上不到第一呀! (笑)」

Gary：「我不敢奢望嘛! 你覺得獎項對一個歌手的重要性有少多呢?」

家駒：「Beyond出道初也沒得任何新人獎，得獎並不代表以後的歌會唱得更好，當然得獎箇然好啦! 獎是一樣好表面化的東西。不過我覺得一些有地位的歌手比起新人對獎項的得失有更大的壓力。誰人不愛攞獎? 有就當作錦上添花，沒有亦不必看得太重。」

Gary：「家駒你很少替其他歌手寫歌，是甚麼原因?」

家駒：「沒有人找我嘛! 其實我不會特別去為某個歌手寫歌，因為我一向都有寫歌，若要我特別為那個歌手度身訂造，反令我的創作上的情緒受到影響，我亦替阿Sam、Alan特別寫歌，但知道了他們唱，創作上會有一定的受限制，這會影響我的個人風格。」

Gary：「我覺得『為了你．為了我』完全沒有Beyond的影子啊!」

家駒：「這是編曲的問題，所以Beyond沒揀這首出唱片囉! 因為是Peter Lam編曲，在音樂的層次上已與Beyond有距離，加上是由你去演繹，你用自己的情感去唱，Beyond的感覺更加沒有啦! 但可能將來Beyond拿回這首歌來唱，重新編排，又會變回Beyond的風格。以前亦曾試過，像『歲月無聲』本來是Kitman唱的，Kitman唱的時候人家也說這首歌不似Beyond作的，但我們唱時又說似喎! 其實最重要是由誰Handle。」

Gary：「但某些音樂人作的作品經過歌手演繹後都帶回他的影子喎!」

家駒：「可能整個Production都由他包辦呢! 好像倫永亮作曲、編曲的作品，會好倫永亮的Sound，但我只是寫Melody，編曲的人自己加插意見，再加上你演繹時的意思，所以就沒有了Beyond的影子囉!」

《後話》蔡興麟闖樂壇的第一首作品『為了你．為了我』是由Beyond的家駒為他作曲的，加上他們隸屬同一間經理人公司，所以私底下，Gary與家駒是一對交情不俗的朋友。身為樂壇新人的Gary自然要向師兄家駒偷偷師啦!

photo credit: gary & his team@weibo (8, 9 (except the pic with KC), 10 of 16);

linda liu@sina blog (12, 13 of 16);

祐希的凝望@blogger (9 (the pic with KC) of 16)

- - - - - - - - - - - - - - - - - - - -

[last updated in July 2019]

－－－－－－－－－－－－－－－－－－－－－－－
留言小教學 (不用註冊)：
1. 在下方留言格內輸入留言
2. 在 'Comment as:' 一格內揀選 'Name/URL'，小視窗隨即彈出
3. 在 'Name' 一格內輸入你的稱呼，'URL' 一格漏空，再按 'Continue'
4. 按 'Publish' 送出留言
－－－－－－－－－－－－－－－－－－－－－－－